Nokia և Apple ընկերությունները վերջապես հարթեցին արտոնագրային տարաձայնությունները, որոնք սկիզբ էին առել դեռևս 2009թ.: Համաձայն ստորագրված համաձայնագրի՝ Սթիվ Ջոբսի ընկերությունը պարտավորվում է ֆիննական ընկերությանը փոխհատուցում վճարել, որի չափը, սակայն, չի հաղորդվում:
Apple-ը կվճարի Nokia-ին վերջինիս արտոնագրային իրավունքները խախտելու համար: Այս մասին գրում է Nokia-ի պաշտոնական կայքը:
Երկու ընկերությունների միջև արտոնագրային վեճը սկսվեց այն ժամանակ, երբ Nokia-ն հայտարարեց, որ iPhone սմարթֆոնում անօրինական կերպով օգտագործվում են տասն արտոնագրված տեխնոլոգիաներ: Apple-ը փորձեց պաշտպանվել, սակայն 2011-ին Nokia-ն կրկին Apple-ին մեղադրեց «իր բոլոր արտադրանքներում արտոնագրային իրավունքները խախտելու մեջ»:
